ಶನಿವಾರ, ಏಪ್ರಿಲ್ 27, 2013

ಕನವರಿಸಿದ ಮನದ ದನಿ



ಕಾನನದ ಕೋಗಿಲೆಯೆ
ಕೊರಳಿನಲಿ ಇಂಪೆರೆದು
ತನುಮನದಿ ಕಂಪನವ ತಂದಿರಿಸಿದೆ.
ಚಣಚಣದ ಕಂಪನದಿ
ಇಂಚರದ ನುಡಿಯೊಂದು
ನನ್ನೆದೆಯ ಅಂಗಳದಿ ಪದವಿರಿಸಿದೆ.

ಬನದನಿಯ ಇಂಚರಕೆ
ನನ್ನೆದೆಯು ಅನುರಣಿಸಿ      
ಕಣಕಣದಿ ಕವನವನು ಅಣಿಗೊಳಿಸಿದೆ.
ಅನುದಿನವು ಕನವರಿಸಿ
ಇನಿದನಿಗೆ ಹಾತೊರಿಸಿ
ಮನತಣಿಪ ನುಡಿಯೊಂದನನುಗೊಳಿಸಿದೆ.

ಹನಿಹನಿಯು ಹೊನಲಾಗಿ
ಅನುದಿನವು ಹರಿವಂತೆ
ಕನವರಿಪ ಮನವೆಲ್ಲ ದನಿಯಾಗಿದೆ.
ಇನಿದನಿಗೆ ಮನತಣಿದು
ಎನ್ನೆದೆಯು ತಂಪಾಗಿ
ಕಣ್ಣುಗಳ ಅಂಚಿನಲಿ ಹನಿಜಾರಿದೆ.




ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ