ಅವಸರಿಸದಿರು ಮನವೆ!

ಓಡುತಿಹೆ ವೇಗದಲಿ ಗೊತ್ತುಗುರಿಯಿಲ್ಲದೆಯೆ

ಏನನ್ನು ತರಬೇಕು?- ಕೇಳು ಮನವೆ.

ನಿನ್ನ ವೇಗದ ಗತಿಗೆ ಮಿತಿಹಾಕಿ ಬಾ ಬಳಿಗೆ

ಇರಬಹುದು ನನ್ನೊಳಗೆ ತರುವ ವಸ್ತು.

ಇಂಧನವ ಹಾಕಿದೊಡೆ ಓಡಬಾರದು ಹಾಗೆ

ಗುರಿಯನ್ನು ಅರಿಯುತ್ತ ನಡೆಯಬೇಕು.

“ಕುಟ್ಟಿ ಕುಂದಾಪುರಕೆ ಹೋದಂತೆ ಹೋಗದಿರು”

“ಏನನ್ನು ತರಬೇಕು?”- ತಿಳಿದು ಹೋಗು.

ನಾನು ಹೇಳುವ ವಸ್ತು ತರಬೇಡ ಅವಸರದಿ

“ನಿನಗೇಕೆ ಅದುಬೇಕು?”  ಕೇಳು ಒಮ್ಮೆ.

ಕುಳಿತೊಮ್ಮೆ ಮಾತಾಡಿ ಹೋಗಿ ಬಾ ನಡೆಯುತ್ತ

ನೋಡುವೆನು ಎಲೆ ಮನವೆ! ನಿನ್ನ ನಡೆಯ.